गोंदिया : गोंदिया पोलीस दलामार्फत पोलीस शिपाई भरती 2022-2023 (प्रत्यक्ष भरती प्रक्रिया 2024) 110 जागांसाठी भरती प्रक्रिया राबविण्यात येणार आहे. सदर भरती करिता मैदानी (शारिरीक) चाचणी 19 जून ते 4 जुलै 2024 या कालावधीत राहणार असल्याची माहिती गोंदियाचे पोलीस अधिक्षक निखिल पिंगळे यांनी पत्रपरिषदेत दिली. ही भरती कारंजा येथी पोलीस मुख्यालयातील पटांगणावर आयोजित करण्यात आलेली आहे. पत्रपरिषदेला अतिरिक्त पोलीस अधीक्षक नित्यानंद झा,गोंदिया शहर पोलीस ठाण्याचे पोलीस निरिक्षक सुर्यवंशी उपस्थित होते.सविस्तर असे की, गोंदिया पोलीस शिपाई पदाकरीता सुमारे 8000 उमेदवारांनी अर्ज सादर केले आहे. त्या उमेदवारांची शारीरीक चाचणी परिक्षा १९/0६/२०२४ ते ०४/0७/२०२४ या कालावधीत पुर्ण करण्यात येणार आहे. पोलीस शिपाई पदाकरीता दरदिवशी सरासरी ३00 उमेदवारांची शारिरिक (मैदानी) चाचणी घेण्यात येणार आहे. सर्व उमेदवारांना पोलीस शिपाई पदाच्या मैदानी (शारिरीक) चाचणी परीक्षेचे प्रवेशपत्र हे महाआयटी विभागामार्फत ऑनलाईन पद्धतीने डाऊनलोड करण्यास उपलब्ध करुन देण्यात आले आहे. तरी, सर्व उमेदवारांनी आपले मैदानी (शारिरीक) चाचणी परीक्षेचे प्रवेशपत्र https://policerecruitment2024.mahait.org या वेबसाईटवरुन डाऊनलोड करुन घ्यावे तसेच प्रवेशपत्रावर नमूद असलेल्या मैदानी (शारिरीक) चाचणी परिक्षेची तारिख लक्षात घेऊन मैदानी (शारिरीक) चाचणी करीता आवश्यक कागदपत्रासह पोलीस मुख्यालय गोंंदिया(कारंजा) येथे हजर रहावे असे आवाहन जिल्हा पोलीस अधिक्षक निखिल पिंगळे यांनी केले आहे. सदर पदभरती प्रक्रिया ही अत्याधुनिक तंत्रज्ञानाचा वापर करुन पुर्णपणे पारदर्शक पध्दतीने करण्यात येणार असुन यामध्ये उमेदवारांची छाती-उंची या शारीरीक मोजणीकरीता पीएसटी (PST) Digital Physical Standard Test तंत्रज्ञानाचा वापर करण्यात येणार आहे. तसेच उमेदवारांची 1600 मी. धावणे (पुरुष), 800 मी. धावणे (महिला), 100 मी. धावणे (पुरुष व महिला) च्या चाचणी करीता (RFID) Based Technology चा वापर करण्यात येणार आहे. यासोबतच गोळा फेक चाचणीकरीता Prism Technology चा वापर करण्यात येणार आहे. मैदानी (शारिरीक) चाचणीमध्ये उत्तीर्ण होवुन लेखीपरीक्षेकरीता पात्र उमेदवारांची बायोमॅट्रीक पध्दतीने हजेरी घेवुन पडताळणी करण्यात येणार आहे. जर पावसामुळे एखादे दिवशी मैदानी चाचणी होवु शकली नाही तर त्यांना पुढची सुयोग्य तारीख दिली जाईल. सोबतच काही उमेदवारांना वेगवेगळया पदाकरीता एकापेक्षा जास्त ठिकाणी आणि एकाच दिवशी मैदानी चाचणी करीता हजर राहण्याची सुचना प्राप्त झाली अश्या उमेदवारांना दुसरी तारिख दिली जाईल. उमेदवारांना इतर काही अडचणी आल्यास त्याचे निरसन स्थानिक पातळीवर करण्यात येईल. सदर पदभरती प्रक्रियेमध्ये उमेदवारांनी कोणत्याही गैरमार्गाचा वापर करु नये, असे करतांना आढळुन आल्यास उमेदवाराची उमेदवारी तात्काळ रद्द करुन त्याचेवर प्रचलित कायद्यान्वये योग्य ती कायदेशीर कार्यवाही करण्यात येईल. उमेदवारांनी कुठल्याही प्रलोभन किंवा आमिषाला बळी पडू नये तसेच कोणीही आमिष किंवा प्रलोभन देत असेल तर पोलीस अधीक्षक कार्यालय, गोंदिया येथील तक्रार कक्षात तसेच उपविभागीय पोलीस अधिकारी कार्यालय/पोस्टे/उपपोस्टे/पोमकें येथे माहिती द्यावे, असेही पिंगळे यांनी आवाहन केले आहे.
