8 हजारांची लाच घेताना अटक : लाचलुचपत प्रतिबंधक विभागाची कारवाई
गोंदिया : शहर पोलिस ठाण्यात गुन्हा नोंद न करण्यासाठी आणि तक्रारदार व गैरअर्जदार यांच्यात तडजोडी करून देण्याकरिता 8 हजार रुपयांची लाच घेताना शहर पोलिस ठाण्यात कार्यरत सहायक पोलिस उपनिरीक्षकाला एसीबीने रंगेहात पकडले. अनिल फागुजी पारधी (वय 54, रा. श्रीनगर) असे आरोपीचे नाव आहे. ही कारवाई गोंदिया लाचलुचपत प्रतिबंधक विभागाने रविवार, 26 मे रोजी केली. तक्रारकर्ता ट्रॅक्टर चालक असून त्याच्याविरूध्द 24 मे रोजी गैरअर्जदाराने गोंदिया शहर पोलिस ठाण्यात तोंडी तक्रार केली. तक्रारीनंतर सपोउपनि अनिल फागुजी पारधी याने तक्रारकर्त्याशी संपर्क केला. दरम्यान दोघांचे भांडण आपसात समजुत घडविण्यासाठी आपण प्रयत्न केले. त्यामुळे गुन्हा दाखल होणार नाही, या मोबदल्यात 10 हजार रूपये लाचेची मागणी केली. दरम्यान तक्रारकर्त्याला लाच देण्याची मुळीच इच्छा नसल्याने लाचलुचपत विभागाकडे तक्रार दाखल केली. यानुरूप सहनिशा केली असता सपोउपनि पारधी 10 हजार रूपये लाच मागत असल्याचे समोर आले. दरम्यान आज (ता. 26) सापळा रचण्यात आला असता सपोउपनि याने तक्रारकर्त्यांकडून तडजोडीतून 8 हजार रूपये लाच स्विकारली. यामुळे लाचलुचपत विभागाने आरोपी सपोउपनि अनिल पारधी यांच्या विरूध्द गोंदिया शहर पोलिस ठाण्यात लाचलुचपत प्रतिबंधक कायद्यातंर्गत गुन्हा नोंद करून अटक केली आहे. ही कारवाई पोलिस अधीक्षक राहुल माकनीकर, अप्पर पोलिस अधीक्षक सचिन कदम, संजय पुरंदरे यांच्या मार्गदर्शनाखाली उपअधीक्षक विलास काळे, पोलिस निरीक्षक अतुल तवाडे, सफौ चंद्रकांत कर्पे, संजय बोहरे, मंगेश कहालकर, संतोष शेंडे, संतोष बोपचे, अशोक कापगते, प्रशांत सोनवाने, रोहिनी डांगे, दिपक बाटबर्वे यांनी केली.
