पाच राज्यांतील विधानसभा निवडणूक संपल्यानंतर आता देशातील सर्वच राष्ट्रीय आणि प्रादेशिक पक्षांना लोकसभा निवडणुकीचे वेध लागले आहेत. प्रादेशिक पक्ष आपापल्या स्तरावर तयारी करीत आहेत. दरम्यान, पश्चिम बंगालमधील सत्ताधारी तृणमूल काँग्रेसनेही या निवडणुकीसाठी तयारी सुरू केली असून, पक्षबांधणी, तसेच लोकांपर्यंत पोहोचण्याचा प्रयत्न केला जात आहे. असे असतानाच आता या पक्षात वयोमर्यादेचा मुद्दा उपस्थित झाला आहे; ज्या नेत्यांचे वय जास्त झालेले आहे, त्यांनी आता तरुण नेत्यांना संधी द्यावी, अशी भावना काही नेत्यांकडून व्यक्त केली जात आहे. याच कारणामुळे सध्या तृणमूल काँग्रेस पक्षातील नेत्यांमध्ये अस्वस्थता निर्माण झाली आहे.
१० खासदारांचे वय हे ६५ वर्षांपेक्षा अधिक
तृणमूल काँग्रेसचे एकूण २३ खासदार आहेत. त्यातील १० खासदारांचे वय हे ६५ वर्षांपेक्षा अधिक आहे; तर पाच खासदारांचे वय हे ७५ वर्षांपेक्षा अधिक आहे. लोकसभा निवडणुकीच्या पार्श्वभूमीवर वयाचा मुद्दा चर्चेत आल्यामुळे जास्त वय झालेल्या अशा अनेक नेत्यांबाबत वेगवेगळ्या चर्चा सुरू झाल्या आहेत.
