टू व्हिलर मेकॅनिकचे मोफत प्रशिक्षण
गोंदिया, दि.28 : देशात वाढत्या बेरोजगारी, सुशिक्षीत बेरोजगारांची दिवसेंदिवस वाढत असलेली संख्या कमी करण्याच्या दृष्टीकोनातून ग्रामीण विकास मंत्रालय, भारत सरकार, महाराष्ट्र राज्य ग्रामोन्नती अभियान (उमेद), नाबार्ड व माविम यांनी देशातील प्रत्येक जिल्ह्यात ज्या प्रमुख बँका आहेत त्यांच्याकडे अशा आरसेटी चालवण्याची जबाबदारी सोपविण्यात येते.
बँक ऑफ इंडिया ग्रामीण स्वयंरोजगार प्रशिक्षण संस्था कुडवा (गोंदिया) द्वारे जिल्ह्यातील बेरोजगार युवक व युवतींना स्वयंरोजगार करण्यासाठी प्रोत्साहीत करण्याकरीता विविध प्रकारचे स्वयंरोजगार प्रशिक्षण आयोजित केले जात असून ही संस्था 21 जानेवारी 2011 पासून कार्यरत आहे. तसेच ही संस्था भारत सरकारच्या ग्रामीण विकास मंत्रालयाद्वारे संचालित केले जाते. स्वयंरोजगार प्रशिक्षण संस्थेने आजपर्यंत 9 हजार 250 ग्रामीण व्यक्तींना प्रशिक्षण दिले असून त्यापैकी 6 हजार 986 व्यक्तींनी मिळविलेल्या प्रशिक्षणाच्या आधारे स्वयंरोजगार सुरु केला आहे.
बँक ऑफ इंडिया (आरसेटी) स्टार स्वयंरोजगार प्रशिक्षण संस्थेद्वारे बेरोजगार 18 ते 45 वयोगटातील व्यक्तींकरीता ‘टू व्हिलर मेकॅनिक’ या व्यवसायाचे 30 दिवसीय मोफत प्रशिक्षण 3 मार्च 2025 पासून सुरु होणार आहे. यासाठी आरसेटीला कोर्स सुरु करण्याकरीता कमीत कमी 30 ते 35 उमेदवारांची गरज असते. तसेच या संस्थेमध्ये विविध प्रकारचे कोर्स नि:शुल्क असून राहण्याची व जेवणाची नि:शुल्क सोय प्रशिक्षण संस्थेतच करण्यात येत आहे. याकरीता गोंदिया जिल्ह्यातील ग्रामीण भागातील इच्छुक युवक-युवतींनी जास्तीत जास्त संख्येने व लवकरात लवकर सदर संस्थेत येऊन आपले नाव नोंद करावेत.
ग्रामीण भागातील सुशिक्षीत बेरोजगारांनी या सुवर्ण संधीचा लाभ घ्यावा व तांत्रिक प्रशिक्षण घेऊन स्वयंरोजगार करावा. याकरीता ग्रामीण भागातील बेरोजगारांना प्राधान्य देण्यात येईल. इच्छुक उमेदवारांनी आपले आवेदन पत्र निदेशक, स्टार स्वयंरोजगार प्रशिक्षण संस्थान, वाहने पॅलेस, हरिणखेडे पेट्रोलपंप जवळ, तिरोडा रोड, कुडवा (गोंदिया) येथे त्वरित जमा करावे. अधिक माहितीसाठी कार्यालयीन दूरध्वनी क्रमांक 07182-252007 अथवा 8698140105 यावर संपर्क साधावा, असे संस्थेचे निदेशक अब्दुल वसीम यांनी कळविले आहे.
