देवरी : उत्तर वनपरिक्षेत्र अंतर्गत येणाऱ्या बिटातील नागपुर – रायपुर हायवेवर भर्रेगाव फाट्या जवळील हत्तीदेव परिसरात अज्ञात वाहनाच्या धडकेत चितळचा मृत्यू झाल्याची घटना बुधवारी सकाळी आठ वाजताच्या दरम्यान उघडकीस आली. महामार्गावरुन रस्ता ओलांडतानी अनेक जंगली प्राणी या बाजुकडून दुसऱ्या बाजुकडे ये जा करीत असतात. या जंगल परिक्षेत्रात बिबट, चितळ, हरीण, अस्वल, डुक्कर आदी प्राण्यांचा नेहमी वावर असतो. त्यातच आता उन्हाळ्याचे दिवस असल्याने देवरी तालुक्यात सूर्य आग ओकत आहे. त्यामुळे जंगलातील ठीकठिकाणी असलेले पाणवठे कोरडे पडले आहेत. उन्हाळ्याच्या दिवसात जंगली प्राणी पाण्याच्या शोधात भटकंती करीत असतात अशीच भटकंती करीत असताना बुधवारी सकाळी 8 वाजताच्या सुमारास नागपुर – रायपुर हायवे वरील भर्रेगाव फाट्याच्या हत्तीदेव जवळ अज्ञात वाहनाने चितळला जोरदार धडक मारल्याचे आढळून आले. ज्यात चितळचा जागीच मृत्यू झाला. सदर घटनेची माहिती मिळताच वनविभागाचे वनरक्षक व त्यांचे कर्मचारी घटनास्थळी जाऊन पंचनामा केला. मृत चितळाचा पशु वैद्यकीय अधिकारी यांनी पंचनामा करून दफन विधी करण्यात आली.
