निलज जिप शाळेतील प्रकार : शिक्षण विभागाचा उडाला बोजवारा
अर्जुनी मोरगाव, (गोंदिया) : अर्जुनी मोरगाव तालुक्यातील निलज येथील जिल्हा परिषद प्राथमिक शाळेत विद्युत गळती होऊन शालेय इमारतीला विद्युत प्रवाह सुरू झाला. परिणामी शालेय विद्यार्थ्यांना भिंती द्वारे विजेचा शॉक बसल्याची घटना 25 जुलै रोजी सकाळी घडली. मात्र, वेळीच हा प्रकार लक्षात आल्याने सुदैवाने मोठा अनर्थ टळला. भंडारा जिल्ह्यातील पुयार येथे विद्युत शॉक लागून काही दिवसांपूर्वीच एका शाळकरी मुलाचा मृत्यू झाल्याची दुर्दैवी घटना घडली होती. मात्र या प्रकारातून अद्यापही शिक्षण विभागाने बोध घेतल्याचे दिसून येत नाही. गुरुवारी नित्यप्रमाणे शाळा भरली. वर्ग सुरू होण्याआधी विद्यार्थी पटांगणात खेळत होते. काही विद्यार्थ्यांचा शाळेच्या गॅलरीच्या भिंतीला स्पर्श होताच झटका बसला. विद्यार्थ्यांनी ही बाब मुख्याध्यापिका जांभुळकर यांना सांगितला. त्यांनी पाहणी केली असता भिंतीत विद्युत प्रवाह असल्याचे समजले. दरम्यान लाईनमन पाचारण करुन शाळेचा विद्युत प्रवाह बंद करण्यात आला. ही वार्ता परिसरात वार्‍यासारखि पसरली. शाळेत एक ते चार वर्गात शिक्षण घेणारे 42 विद्यार्थी आहेत. शाळेची स्थापना 1964 ला झाली. शाळा दोन शिक्षकी आहे. शाळेची इमारत अत्यंत जुनी असल्याने जीर्ण अवस्थेत आहे. इमारतीला अनेक ठिकाणी भेगा पडल्या आहेत. छत गळतीमुळे वर्गामध्ये ओलावा राहतो. या ओलाव्यावरच विद्यार्थी अध्ययन करतात. छत गळतीमुळे विद्यार्थ्यांना कमालीची त्रास सहन करावा लागतो. जिल्हा परिषदेने नुकतेच सर्वसाधारण सभेमध्ये निवडक शाळांना मॉडेल बनवण्यासाठी ठराव पारित केले आहे. मात्र केवळ एक शाळा मॉडेल बनवून होणार नाही. जिल्ह्यातील सर्व जीर्ण इमारतींचे ऑडिट करून नव्याने इमारती तयार कराव्यात जेणेकरून गरिबांचा आधार असलेली जिल्हा परिषद शाळा उत्तम प्रकारे शिक्षण देण्यास समर्थ ठरेल अशी अपेक्षा नागरिकांनी केली आहे. विद्यार्थ्यांना स्वच्छ पाणी मिळावे म्हणून पंचायत समितीने लावलेले वॉटर फिल्टर देखभाल दुरुस्ती अभावी बंद आहे. ज्या ठिकाणी विद्युत मीटर बसविलेले आहे त्या संपूर्ण भिंतीला ओलावा आहे. त्यामुळेच ही विद्युत गळती होत असावी असा प्राथमिक अंदाज आहे. तसेच दोन वर्षाआधी जिल्हा परिषदेने तीन लक्ष रुपयांचा निधी मंजूर करून छतगळती थांबविण्यासाठी उपाययोजना केली होती. मात्र कंत्राटदाराने अधिक नफेखोरीच्या नादात निधीची वासलात लावल्याचे आरोप गावातील नागरिकांनी केली आहे.
लवकरच इमारत बांधकामाला सुरुवात….
निलज येथील जिप शाळेची इमारत फार जुनी आहे. शाळेला इमारत मंजूर असून नवीन शाळा इमारत बांधकाम चार-पाच दिवसात सुरू होईल.
कविता कापगते, जिल्हा परिषद सदस्य
