इसापूर येथील भावे हत्याकांड
अर्जुनी मोरगांव, (गोंदिया) : अनैतिक संबंधातून पत्नीने पतीचा गळा आवळून हत्या केल्याचा प्रकार तालुक्यातील इसापूर/ईटखेडा येथे 12 जून रोजी उघडकीस आला होता. याप्रकरणी आरोपी पत्नी वैशाली मेघशाम भावे (वय 42) हिला ताब्यात घेतले होते. गुरुवारी तिचा प्रियकर तेजेराव भुजंग गादगे (वय 22) रा. बिलोली जिल्हा नांदेड याला अटक केली. सडक अर्जुनी न्यायालय हजर केले असता दोन्ही आरोपींना 18 जूनपर्यंत पोलिस कोठडी मिळाली आहे. तेजराव भुजंग गादगेशी दोन वर्षापूर्वी ओळख झाली. ओळखीचे मैत्रीत व नंतर प्रेमात रुपांतर झाले. तेजेराव हा अधूनमधून वैशालीला भेटण्यासाठी ईसापुर येथे यायचा. तेजेराव पिकप चालक आहे. वैशालीला पती, सासू-सासरे सोबत राहायचे नव्हते. 11 जून घटनेच्या दिवशी आरोपी तेजेराव सकाळी ईसापुरला आला. रात्री घरा मागचा दरवाजा उघडा ठेवला. त्याने मेघशामच्या घरी प्रवेश केला. मध्यरात्रीच्या सुमारास दोघांनीही सुना डाव साधून मेघशामचा गळा आवळुन खून केला. यानंतर रात्रीच तो निघून गेला. तेजेराव पुसद येथे असल्याची माहिती पोलिसांना मिळाली. अर्जुनी मोरगाव पोलिसांनी पुसद पोलिसांना कळविले. पुसद पोलिसांनी तेजेरावला ताब्यात घेतले. येथील पोलिसांचे पथक पुसदला पोहचून आरोपीला ताब्यात घेऊन अर्जुनी मोरगावला आणले. त्याच्यावर गुन्हा दाखल करून न्यायालयात हजर केले. वैशाली व तेजेराव यांना 18 जूनपर्यंत पोलिस कोठडी मिळाली आहे. दोन्ही आरोपींवर कलम 302, 120 (ब) भादंवी अंतर्गत गुन्हा दाखल करण्यात आला आहे. तपास जिल्हा पोलिस अधीक्षक निखिल पिंगळे, अपर पोलिस अधीक्षक नित्यानंद झा, उपविभागीय पोलिस अधिकारी विवेक पाटील यांच्या मार्गदर्शनात पोलिस निरीक्षक विजयानंद पाटील करीत आहेत.
